- Este evento, que ten lugar na Feira Internacional de Galicia ABANCA, recupera o seu formato presencial para inscritos e volve a reunilos nos seus dous pavillóns principais, os cales contan con máis de 10.000 metros cadrados cada un
- Desenvolverase con todas as medidas de seguridade, segundo un plan de prevención fronte á COVID-19
Silleda, 1 de outubro de 2021.- A XGN R Encounter, a maior lanparty de Galicia, ultima xa a súa 21ª edición. Esta celebrarase do 9 ao 11 de outubro retomando o seu formato presencial para inscritos tras levarse a cabo online o pasado ano.
Así, o recinto Feira Internacional de Galicia ABANCA, en Silleda, volverá reunir a profesionais e afeccionados á informática e as novas tecnoloxías nos seus dous pavillóns principais, os cales contan con máis de 10.000 metros cadrados cada un.
O evento desenvolverase con todas as medidas de seguridade, segundo un plan de prevención fronte á COVID-19.
A Feira Internacional de Galicia ABANCA está inmersa nos preparativos desta cita. Así, contará de novo na súa área Intranet, exclusiva para persoas inscritas, cun completo programa de actividades para as que dispoñerán de 20 xigas de velocidade no recinto. En canto á zona Extranet, de acceso libre, será unicamente en formato online, ofrecendo numerosas propostas para desfrutar dende a casa.
Esta edición, coa que se pretende recuperar a interacción dos participantes de forma segura, é a quinta coa operadora galega R como colaboradora e patrocinadora oficial e de novo conta co apoio da Consellería de Política Social da Xunta de Galicia, impulsora da party.
A volta ao formato presencial da Encounter galega reflicte a boa evolución desta cita informática, pois tamén no País Vasco se celebrou en xullo a Euskal Encounter con asistencia de participantes. Trátase das dúas únicas lanparties de España que puideron retomar a fórmula presencial ata a data. A XGN R Encounter está vinculada á rede de Encounters que a Fundacion Euskaltel impulsa desde hai máis de 25 anos e da que forman parte a citada Euskal Encounter, a Gipuzkoa Encounter e a Araba Encounter.
